BIAFRA NEWS : Emmanuel Nwobosi: Ihe ị maghị maka ọchịagha a so Ojukwu kwaa mgbọ n'agha Biafra

 

Onye bụ Emmanuel Nwobosi

Ọtụtụ ndị ọnụ na-eru n'okwu na mpaghara ọwụwa anyanwụ akwaala arịrị maka ọnwụ Emmanuel Nwobosi, ọchịagha kpara ike oge a lụrụ agha Biafra.

Gọvanọ Anambra steeti bụ Willie Obiano, bụ otu onye n'ime ha, ọ gara njem iti aka n'obi na be Nwobosi n'ụbọchị Tuzde Novemba ụbọchị 24, 2020.

Gọvanọ Anambra steeti bụ Willie Obiano ka ọ gara njem iti aka n'obi n'ezinụlọ Nwobosi

Nwobosi gbara afọ iri asatọ na abụọ tupu ọ laa mmụọ mana ihe ndị mmadụ ji echeta ya bụ ịhụnanya ike ọ kpara n'oge agha.

Ị nụchaa akụkọ Nwobosi, ị ga-ekweta ihe Otiegwu bụ Oliver De Coque kwuru sị: "A na-enwe obodo enwe, obodo anaghị eko n'elu ka ụgbọgụrụ'.

Onye bụ Emmanuel Nwobosi?

• Emmanuel Nwora Nwobosi bụ onye Obosi n'Anambra steeti. Aha echichi ya bụ 'Ogene Obosi'
• O ji ọkwa 'Captain' nke ndịagha Naịjirịa, mana oge agha malitere, e nyere ya ọkwa 'Major' nke ndịagha Biafra
• O nwetara ọzụzụ n'ụlọakwụkwọ ndị agha a ma ama bụ 'Royal Military Academy Sandhurst' nke dị na mba UK
• Nwobosi so na ndị agha weghaara ọchịchị n'ike, nke Bekee kpọrọ 'Coup d'etat', n'ọnwa Jenụwarị afọ 1966
• Ọ bụ Nwobosi bụ onye ndị agha nke gara Ibadan ma nwuchie ndị ọchịchị nọ ahụ
• 
   
  
  
  
  
• E mechara nwuchie Nwobosi na ụfọdụ ndị agha ndị ọzọ so kpaa nkata ahụ ma tụkpuo ha n'ụlọ mkpọrọ dị na Kirikiri Legọs, mechaa kpụga ha n'ụlọ mkpọrọ dị n'Enugwu, mechakwaa kpụga ha na nke dị n'Owere.
• Oge agha Biafra malitere, Ojukwu tọhapụrụ ndị niile nọ na mkpọrọ nke Nwobosi bụ otu n'ime ha.
• Ojukwu mere Nwobosi onyeisi ndị na-arụkwa ngwa ọgụ, bụ 'Artillery Commander' na Bekee. Isi ụlọorụ ha oge ahụ dị n'Enugu
• Ogbunigwe 'Shell' tụrụ Nwobosi oge a na-akwa mgbọ n'Obolo-Afọ, tijie ya ngụgụ nakwa ọkpụkpụ azụ, mana ndị agha gbakọtara buga ya ụlọọgwụ ebe e mechara gwọta ya.
• Mgbe agha kwụsịrị, Nwobosi gbara ọsọ ndụ gbaga mba Guyana nke dị na mpaghara Saut Amerịka.
• Na mba Guyana, e nyere Nwobosi ọkwa dị elu n'otu ndị agha mba ahụ.
• O mechara si mba Guyana gaa mba Kanada ma nọọ ebe ahụ ọtụtụ oge tupu ọ lọghachi Naịjirịa.
• Oge Nwobosi lọghachiri Naịjirịa, ọ malitekwara ịrụrụ Ojukwu ọrụ dịka onye enyemaka ya, mana o kweghị eso Ojukwu banye ndọrọndọrọ ọchịchị
• Ruo oge ọ nwụrụ, Nwobosi bụ onye nkwado nnwereonwe Biafra, n'ihi na o kwuru na Naịjirịa ahụghị ndị Igbo n'anya.
• • Ọ bụkwa onye nkwado otu 'Indigenous People of Biafra nakwa onyeisi ha bụ Nnamdi Kanu.
  • N'ọnwa Jenụwarị afọ 2015, oge gọọmentị Anambra steeti mere ncheta maka ndị nwụrụ n'agha Biafra, nke a kpọrọ 'Ọzọemezina', Nwobosi so na ndị a kwanyeere ugwu.
  • Nwobosi nwụrụ n'isi ụtụtụ ụbọchị Tọzde, abalị iri abụọ na anọ nke ọnwa Nọvemba afọ 2020

  N'afọ 2016, Femi Fani-Kayode, jibu ọkwa Mịnịsta njem ụgbọelu na Naịjirịa, dere akụkọ etu Nwobosi si wakpo ụlọ nna ya oge ndị agha weghaara ọchịchị n'ike na 1966.

  Fani-Kayode kọkwara etu Nwobosi na ndịagha ya si gbuo Samuel Akintola, onye ji ọkwa 'Premier' nke mpaghara Ọdịda Anyanwụ Naịjirịa oge ahụ.

  O kwuru sị: "A katọrọ m ihe Nwobosi na ndị agha ya mere n'abalị ahụ. Ana m eru uju nwanne nna m bụ Akintola bụ onye ha gburu n'abalị ahụ."

  "Mana anaghị m ama ya maọbụ ndị otu ya ikpe. Naanị Chukwu ka ikpe dịịrị".

  "Ebughị m ihe ọbụla n'obi megide ha. A hapụla m ha n'aka Chineke."